| Флор Иванович Васильев | |
| Ужъёсыз: |
кылбурчи[d] |
|---|---|
| Вордӥськон нуналэз: |
19-тӥ тулыспалэ 1934 |
| Вордӥськон интыез: |
Бердыши[d], Ворцинское сельское поселение[d], Яр ёрос, Удмурт Автономной Совет Социалист Республика, СССР |
| Кун: |
|
| Кулон нуналэз: |
5-тӥ инвожое 1978 (44 ар) |
| Кулон интыез: |
Иж, Удмурт Автономной Совет Социалист Республика, РСФСР, СССР |
Флор Иванович Васильев — удмурт совето кылбурчи-лирик, Удмуртиысь кылбурчиос пӧлысь одӥгез тужгес тодмоез. Вордӥськиз 19-тӥ феврале 1934-тӥ арын Яр ёросысь пичи гинэ Мой шур ярдурын сылӥсь Бердыш гуртын. Укан черкогуртысь школаез йылпумъяса, Ф. Васильев дышетскыны пыриз Глазысь педучилищеез, нош 1953-тӥ арын — отысь ик пединститутэ. Тодон-валанзэ муромытэм сяна, дыр шедьтылӥз «Красное знамя» ёрос газетын ужаны. 1959-тӥ арын валтӥсь редакторлэн воштӥсез луиз. 1962-тӥ арысен кутскыса, куать ар ӵоже кивалтӥз «Комсомолец Удмуртии» газетэн, нош 1967-тӥ-1968-тӥ аръёсы «Советской Удмуртия» газетлэн редакторезлэн воштӥсез кариськиз. Бӧрысь ини басьтӥськиз «Молот» журнал борды — редакторе пуктӥзы. Озьы ик Удмуртиысь Писательёслэн союззылэн тӧроез луиз. 6-тӥ июле 1978-тӥ арын, сюрес вылын кышкыт учыре шедем бере, больницаын инфарктлэсь кулӥз.
Флор Васильев кылбуръёс гожъяны кутскиз, педучилищеын дышетскыкуз. Таосыз ужъёсыз ылесьгес вал, шуыны луоз. Пединститутын ини чуръёсыз пур пуштросъемесь, вольытэсь пӧрмыны шӧтазы. 1957-тӥ арын куд-ог кылбуръёсыз шедизы «Стихи удмуртских поэтов», «Ворекъяло кизилиос» бичетъёсы. 1967-тӥ арын потэм «Лирика» книгаяз удмурт кылбуръёссэ ӟуч кылэ берыктыса сётэ. 1971-тӥ арын Мускоын югыт дуннеез адӟе солэн «Черёмуха» книгаез. Васильев поттыса вуттӥз удмурт кылбуръёсын 7 книгазэ, ӟуч кылбуръёсын — 5-сэ.
1967-тӥ арын «Лирика» но «Тон сярысь» книгаосыз понна Флор Васильевлы сёто Удмуртиысь комсомоллэсь премизэ, нош 1978-тӥ арын «Времена жизни», «Куар усён толэзе» книгаосыз понна шумпотто Удмуртилэн кун премиеныз. Гожъяськон удысын гижысь-пиньысь тыршемез понна кылбурчи пусъемын «Знак почёта» орденэн.
Флор Васильевлэн кылбуръёсыз печатласькизы Венгриын но. Кылсярысь, 1975-тӥ арын потэм «Medveének» («Гондыр кырӟан») антологиын (бичасез — Петер Домокош) мукет финн-угор гожъяськисьёсын ӵош вань солэн но чуръёсыз.
Кылбуръёсаз автор возьматэ вордӥськем палдэ, анайдэ, ӵыжы-выжыдэ яратон мылкыдэз. Лирической героез котьку дурбасьтэ улонын умоез понна. Валаське: кылбурлэсь шокамзэ — ритмзэ, рифмазэ — гожъяськись туж ӟеч шӧдылӥз. Оло, соин но тросэз ужъёсыз пӧрмемын ини кырӟанъёслы. Инкуазь суредъёс Флор Васильевлэн кылбуръёсаз выжыкылын выллем улӟо кадь. Яратонлы, синмаськонлы сӥзем ужъёсыз но сюлэмез бугырто.
Jj 5p рах,teRr Xдэ Xd500l Mn WессmSs Ffкr X н я