Spmjrzl

Panorama del'Arcea col santuario de Sant'Antonin ben in vista

L'Arcèła xe un dei pì grandi cuartieri de Pàdova, el xe a nord de la stasion feroviaria, co i binari de ła ferovia che, traversando in diresion ovest-est, la separa dal sentro. Ancó se poe ciamare co sto nome deversi tochi de la sità, anca se ła definission pì pròpia ła toe drento łe parte pì visine al sentro, in particołare:

• el Borgomagno, ai pie del pasatisio che parmete de rivarghe da sud;
• ła paròchia de Sant'Antonin e le xone torno che ła senpre stà el core del quartiere oltre che 'l so monumento pì inportante;
• ła paròchia de ła Santìsima Trinità e le parte che ghe sta torno.

Vien considarada Arcèła donca n'area ben definìa a ovest da la ferovia che la ponta a nord verso Vigodàrxare e a est el stradon del Plebiscito, 'ndove che ghe xe el stadio dove che xuga el Petrarca rugby. Asé manco definidi xe i confini a nord, e par sto motivo serti i ciama Arcèła l'intièro cuartiere 2 nord co i so scuaxi 40.000 abitanti, tołendo drento anca łe locałità na volta ben destinte ma ancó in continuità urbana, de San Carlo (a nord-est), San Bełin (a nord-ovest) e Pontevigodàrxare, co st'ultima che ła xe bastansa stacada in fondo sora de tute. Considarando soło che l'Arcèła pròpia, ła ga un fià pì de 15.000 abitanti.

El cuartiere se ga sviłupà intensamente da un grupo de pochi edifisi che ghe gera solo che torno a ła cexa de Sant'Antonin e a łe parte pì visine a la stasion durante el perìodo del secondo dopoguera. El sviłupo el ga sevità łe linee de łe tre strade prinsipałi che łe parte ai pie del pasatisio del Borgomagno. Via Tiziano Aspetti xe ła pì inportante, ła sta pì a est e ła porta a nord drito fin a Pontevigodàrxare e Castagnara, dónca ła vecia statałe del Santo che ła riva a Canposanpiero e Casteło; el stradon el se recognose parché ghe sta su i binari del tran. Ła seconda strada pì granda ła xe via Annibale da Bassano che ła ponta verso nord-ovest in diresion de cueła che, traverso el Sacro Core, 'l Altichiero e Łìmena, ła deventa ła statałe de ła Valsugana par Sitadeła e Bassàn. In meso a ste dó strade, gavemo ła via Buonarroti che ła fenisse a San Bełin.

El santuario de Sant'Antonin xe l'atrativa pì granda del cuartiere, soratuto parché xe el posto 'ndove che xe morto el Santo e donca ghe riva anca i pełegrini. Cueło de ancó xe na recostrussion del XIX sècoło de na cexa conventuałe che ła existeva da asé prima, cusì come ła sagra de łe noxe che ghe se fa vanti ogni setenbre.

N'altra roba de l'Arcèła, situà in fondo verso San Carlo, xe el stadio Colbachini, che xe el canpo de atlètica pì inportante de Pàdova.

Pa'l resto, l'Arcèła de ancó ła xe un cuartiere rexidensiałe. Ła gera considarà na xona asé prestigioxa ma tei ùltimi ani ła ga tolto su na bruta fama, anca fora da Pàdova. Dai ani '90, conpagna a ła xona de ła stassion che ła ghe sta tacada sùito dopo i binari a sud, ła se ga inpienada de foresti e xe saltai fora na serie de problemi sociałi łigai a degrado e criminałità, in particołare te ła xona del Borgomagno. Par sto motivo, ghe xe tentativi de réndare el cuartiere pì visùo e partesipà dai so abitanti, oltre che pì seguro co un presidio permanente dei pułisioti visin al pasatisio.